बैतडी । जिल्लाको पुर्चौडी नगरपालिका–७ मा गएराति जन्ती लिएर फर्किरहेको बस दुर्घटना हुँदा १३ जनाको मृत्यु भएको छ भने ३४ जना घाइते भएका छन्। दुर्घटना बढ्गाउँ मोडमा भएको जिल्ला प्रहरी कार्यालय बैतडीले जानकारी दिएको छ।
सूचना अधिकारी इन्सपेक्टर बलदेव बडुले बताए अनुसार, दुर्घटना भएको बस पुर्चौडी–७ को भौनीबाट जन्ती लिएर घर फर्किंदै थियो। दुर्घटनामा परी मृत्यु हुनेहरूको संख्या १३ पुगेको छ। घाइतेमध्ये २५ जनाको डडेलधुरामा र ४ जनाको बझाङको देउलेकमा उपचार भइरहेको छ। थप ५ घाइतेलाई उच्चस्तरीय उपचारका लागि धनगढीमा रिफर गरिएको छ।
बस चालक विरेन्द्र बुढालाई प्रहरीले नियन्त्रणमा लिएर थप अनुसन्धान गरिरहेको छ। प्रहरीले दुर्घटनाको कारण पत्ता लगाउन दुर्घटनास्थलको निरीक्षण गरिरहेको जनाएको छ।
विवाहका बेहुला–बेहुली भने अर्को गाडीमा सवार रहेकाले सुरक्षित रहेको प्रहरीले जनाएको छ।
दुर्घटनामा मृतक र घाइतेमध्ये धेरैको अवस्था गम्भीर रहेको बताइएको छ। स्थानीय प्रशासनले घटनास्थलमा राहत कार्य थालेको छ र परिवारलाई समेत घटना सम्बन्धी जानकारी गराइरहेको छ।
