चितवन, २५ माघ २०८२ – नेपालमा अण्डाको मूल्यमा ठूलो गिरावट आएको छ। नेपाल लेयर्स कुखुरापालक सङ्घले सोमबारदेखि लागू हुने गरी नयाँ मूल्य घटाएको जनाएको छ। सङ्घका अध्यक्ष विनोद पोखरेलका अनुसार, नेपालमा अण्डाको उत्पादन बढ्नु र यसै समयमा भारतबाट पनि ठूलो मात्रामा अण्डा आयात हुनु मूल्य घट्ने प्रमुख कारण हुन्।
अधिकारिक रूपमा जारी समर्थन मूल्य अनुसार, ठूलो अण्डा (३० वटाको प्रतिक्रेट) अब रु ३७५ र मिडियम अण्डा रु ३३५ कायम गरिएको छ। यसअघि माघ २२ गते ठूलो अण्डा रु ४३५ र मिडियम रु ४०५ रहेको थियो भने माघ ११ गते क्रमशः रु ४९५ र रु ४७५ पुगेको थियो।
गत मङ्सिरमा अण्डाको मूल्य अहिलेसम्मकै उच्च थियो। त्यतिबेला फार्मबाट ठूलो अण्डा रु ५६५ र मझौला अण्डा रु ५५० प्रतिक्रेटमा बिक्री भएको थियो। सङ्घका अध्यक्ष पोखरेलले जानकारी दिएअनुसार, भारतीय सेतो अण्डाको बढ्दो आयात र आन्तरिक उत्पादन वृद्धिका कारण नेपाली अण्डाले बजारमा प्रतिस्पर्धा गर्न सकिरहेको छैन। सङ्घले भारतीय अण्डा रोक्न सरकारी निकायसँग निरन्तर माग गर्दै आएको छ।
अण्डाको उत्पादन लागत प्रति गोटा रु १९.१२ पर्छ, जस अनुसार प्रतिक्रिया ३० वटाको लागत मूल्य रु ५७४.३५ हुन्छ। समर्थन मूल्य लागत नजिक रहे पनि मूल्य घट्दा किसान निराश भएका छन्।
सङ्घले देशभरका फार्मबाट मूल्य संकलन गरी चितवनको बजार मूल्यलाई आधार मान्दै अण्डाको समर्थन मूल्य निर्धारण गर्दै आएको छ।
